Það er mikilvægt að börnum og foreldrum finnist þau vera velkomin í leikskólann. Starsfólk leikskólans heilsar börnunum vel þegar þau koma og kveðja þau þegar þau fara. Við biðjum foreldra að fylgja börnunum alltaf til kennara þegar þau koma og láta vita þegar þau fara.

Að börnin læri að vinna í hóp og taka tillit til hver annars. Í hópastarfi er börnunum skipt niður í minni hópa eftir aldri og fylgir leiðbeinandi hópnum allan veturinn. Með því að vera í sama hópnum ná börnin að kynnast/þekkja hvert annað betur og þá myndast traust sem er grunnurinn að góðu starfi. Vinnustundin hefst og henni lýkur á sama hátt. Upphaf - athöfn/framkvæmd - endir, veitir mikið öryggi og börnin vita hvað er framundan. Þemastarfið er unnið í hópavinnu.

Leikurinn veitir barninu ánægju og er gleðigjafi þess og nautn. Þó að margar kenningar hafi komið fram þar að lútandi, eiga fræðimenn erfitt með að skilgreina hann. Leikurinn er eins og lífið sjálft sem á stundum getur verið erfitt að fóta sig í en getur veitt okkur gleði og ánægju í samskiptum við aðra.

Þegar börn byrja í leikskóla eru þau með mismunandi þarfir og væntingar. Ólíkan bakgrunn og frá ólíku umhverfi. Hvert og eitt barn er einstakt og á að horfa á það sem slíkt, hvert með sinn persónuleika og hver einstaklingur hefur ákveðna færni og möguleika á að læra að leysa þau vandamál sem upp koma í leiknum og slíkt getur oft verið flókið.

Opið leikefni eins og kubbar, leir, vatn, sandur, málning, litir, skæri o.fl. bjóða ekki upp á fyrirfram ákveðnar lausnir eins og hefðbundin leikföng gera oft. Þessi efniviður er góð viðbót við þau leikföng sem börnin eiga heima hjá sér.  Þau læra frekar að bjarga sér með opið leikefni og hugmyndaflug þeirra eykst í leik.

Val er umgjörð um frjálsa leikinn. Valið er grundvallað á hugmyndum um áhugahvöt og virkni barnsins. Val býður upp á að verið sé með fjölbreytt verkefni og nýtingu á húsnæði og búnaði leikskólans. Í vali er það áhugahvöt barnsins sem ræður og barnið þarf að standa við valið/bera ábyrgð á vali sínu.